Herio Arthritis

Os ydych chi’n chwilio am ffyrdd o ymdopi â’ch arthritis, gallai’r cwrs hwn fod yn addas i chi. Efallai eich bod chi newydd ddarganfod yn ddiweddar bod arthritis arnoch chi, efallai eich bod chi wedi bod yn byw gyda’r anhwylder ers peth amser, neu efallai bod rhywun sy’n agos atoch chi ag arthritis. Os ydych chi’n teimlo bod angen help arnoch (ac os ydych chi dros 18 oed), dewiswch Herio Arthritis.

‘Rwy’n teimlo’n well ers i fi fod ar y cwrs hwn. Rwy’n cerdded yn well, ac mae’r ffordd rwy’n dal fy nghorff yn well o lawer. Mae hynny wedi codi fy nghalon ac wedi fy helpu i ymdopi â byw o ddydd i ddydd.’

Iawn, beth yw hyd y cwrs?

Mae’r cwrs yn cynnwys sesiwn dwy awr a hanner o hyd unwaith yr wythnos am chwe wythnos (mewn lleoliad hygyrch). Mae’n bymtheg awr i gyd – nad yw’n llawer o amser o ystyried y gallai’r cwrs wella ansawdd eich bywyd yn sylweddol.

Beth fydd yn digwydd felly?

Mae’r sesiynau wythnosol yn llawer o hwyl. Bydd sgyrsiau llawn gwybodaeth yn cael eu cyflwyno gan yr hyfforddwyr (sydd ag arthritis eu hunain ac sydd wedi cael hyfforddiant dwys), a bydd gweithgareddau ymarferol a sesiynau rhannu syniadau’n cael eu cynnal hefyd. Bydd digon o bethau i chi roi cynnig arnynt, eu profi a’u hymarfer gartref.

Beth mae’r cwrs yn ymdrin ag e yn ystod y chwe wythnos?

• Ymdrin â rheoli poen – byddwn yn edrych ar ffyrdd o ymdopi â phoen, a byddwn yn ymarfer nifer o dechnegau penodol
  
• Ymdrin â meddyginiaeth – byddwn yn dangos sut i werthuso a yw triniaeth neu therapi amgen yn gweithio yn eich achos chi, a byddwn yn trafod ble gallech chi fynd i gael help a chyngor
  
• Ymdrin ag ymarfer corff – byddwn yn trafod manteision ymarfer corff diogel ac yn dangos rhai ymarferion erobig, ymarferion ystwytho ac ymarferion cryfhau syml i chi
  
• Ymdrin â sgiliau cyfathrebu – byddwn yn archwilio sut gallwch chi gyfathrebu â’ch tîm gofal iechyd, eich teulu a’ch ffrindiau i egluro eich teimladau a’ch anghenion, a sut gall cyfathrebu’n well eich helpu i wella eich perthynas â phobl eraill
  
• Ymdrin ag emosiynau – byddwn yn edrych ar yr emosiynau anodd sy’n rhan annatod o fyw gydag arthritis, a byddwn yn trafod sut gallech chi ddelio â nhw
  
• Ymdrin â chynllunio camau gweithredu – byddwn yn eich helpu trwy gydol y cwrs i lunio eich cynlluniau gweithredu eich hun, sef camau bach a fydd yn eich helpu chi i weithio tuag at eich nodau personol.

A beth fydd y gost i mi?

Gallwch chi fynychu ein cyrsiau i gyd yn rhad ac am ddim. Rydym yn cael ein hariannu gan gyrff amrywiol sy’n talu am gostau cynnal y cwrs. Mae hynny’n warant arall o ansawdd mewn gwirionedd, oherwydd rhaid i ni werthuso pob cwrs a darparu adborth i’n cyrff ariannu i ddangos sut mae pob cwrs wedi mynd.

Os yw’n rhad ac am ddim, sut bydda i’n gwybod ei fod e’n dda?

Un rheswm: mae tystiolaeth yn dangos bod Herio Arthritis yn gweithio. Mae’r adborth a gawn yn dangos bod pobl yn gwybod mwy ac wedi gwneud newidiadau cadarnhaol i’w bywydau oherwydd eu bod nhw wedi cymryd rhan yn y cwrs - edrychwch. Yn ogystal, mae ymchwil glinigol yn dangos bod y cwrs yn helpu i leihau pryder ac yn gwella hyder pobl wrth ymdopi â’u hanhwylder.

Mae’n swnio’n grêt - sut galla i gofrestru?

Edrychwch ar ein calendr cyrsiau, a defnyddiwch y wybodaeth sydd yno i lenwi ein ffurflen. Os nad oes cwrs ar gael yn eich ardal chi, anfonwch eich ffurflen atom beth bynnag. Bydd hynny’n golygu y gallwn ni gadw golwg ar y galw a rhoi’r wybodaeth ddiweddaraf i chi am unrhyw gyrsiau newydd a gyhoeddir.