Gynghrair ar Godi Tâl

Mae Gofal Arthritis yn rhan o’r Gynghrair ar Godi Tâl yng Nghymru, sydd wrthi’n ymgyrchu dros gael gofal personol rhad ac am ddim i bobl anabl a phobl hŷn ledled Cymru.  Yn gynharach eleni, penderfynodd Llywodraeth Cynulliad Cymru dorri’r addewid a wnaeth yn ei maniffesto i gyflwyno gofal personol rhad ac am ddim, a thrwy hynny gwelwyd y tro pedol gwleidyddol mwyaf hyd yn hyn yn hanes datganoli Cymru.  Mae’r Gynghrair yn parhau â’i hymgyrch i godi ymwybyddiaeth o’r effaith y mae codi tâl am wasanaethau gofal cymunedol yn ei chael ar bobl hŷn, pobl anabl a gofalwyr, ac mae’n ceisio sicrhau bod y polisi annheg hwn yn cael ei ddileu.

Mae’r Gynghrair ar Godi Tâl yng Nghymru yn dweud fel a ganlyn:

• Mae torri’r addewid i ddarparu gofal cartref rhad ac am ddim yn galluogi’r loteri côd post a’r gwahaniaethu ar sail oedran sy’n digwydd ar hyn o bryd i barhau.  Y bobl a fydd yn talu am annibyniaeth fydd y bobl hynny sydd â’r incwm isaf yn ein cymuned a’r bobl y mae arnynt angen ein help ni fwyaf
  
• Dangosodd ymchwil a gynhaliwyd gan Sefydliad Joseph Rowntree i bolisi’r Alban o ddarparu gofal personol rhad ac am ddim i bobl hŷn sy’n byw gartref ac mewn cartrefi preswyl a nyrsio, bod hynny wedi creu system decach heb orfod gwario gormod o arian cyhoeddus ychwanegol 
  
• Mae’n rhaid i LLCC ailystyried y mater hwn ar fyrder, a dylai ariannu gwaith ymchwil trylwyr i’r gost debygol, y manteision a’r grym cyfreithiol angenrheidiol a fyddai ynghlwm wrth gyflwyno gofal cartref rhad ac am ddim yng Nghymru
  
• Nid yw adolygiad cyfyngedig LLCC o’r modd y mae awdurdodau lleol yn mynd ati ar hyn o bryd i asesu pa daliadau sy’n berthnasol i bobl, yn darparu ateb hirdymor i’r broblem  
  
• Yr unig ffordd deg o ddod â’r annhegwch hwn i ben yw peidio â chodi unrhyw dâl am wasanaethau a gaiff eu darparu trwy gyfrwng asesiad gofal cymunedol

Sut i gymryd rhan

Mae’r Gynghrair ar Godi Tâl wedi llunio Pecyn Ymgyrchoedd, sy’n rhoi gwybodaeth bellach am yr arfer o godi tâl ynghyd â manylion am sut y gellir cefnogi ymgyrch y Gynghrair.  Mae’r pecyn yn cynnwys enghreifftiau o lythyrau y gellir eu hanfon at Aelodau’r Cynulliad a phobl eraill sy’n gyfrifol am wneud penderfyniadau, ac mae’n cynnig syniadau megis trefnu deisebau, stondinau ar y stryd ac ati.